کل رات بزم میں جو مِلا، گلبدن سا تھا

کل رات بزم میں جو مِلا، گلبدن سا تھا

خوشبو سے اُس کے لفظ تھے، چہرہ چمن سا تھا

دیکھا اُسے تو بول پڑے اُس کے خدّوخال

پوچھا اُسے تو چپ سا رہا، کم سُخن سا تھا

تنہائیوں کی رُت میں بھی لگتا تھا مُطمئن

وہ شخص اپنی ذات میں اِک انجمن سا تھا

سوچا اُسے، تو میں کئی رنگوں میں کھو گیا

عالم تمام اُس کے حسِیں پیرہن سا تھا

جو شاخ شوخ تھی، وہ اُسی کے لبوں سی تھی

جو پھول کھِل گیا، وہ اُسی کے دہن سا تھا

وہ سادگی پہن کے بھی دل میں اُتر گیا

اُس کی ہر اک ادا میں عجب بھولپن سا تھا

آساں سمجھ رہے تھے اُسے شہرِ جاں کے لوگ

مشکل تھا اِس قدر، کہ مِرے اپنے فن سا تھا

وہ گفتگو تھی اُس کی، اُسی کے لیے ہی تھی!

کہنے کو، یوں تو میں بھی شریکِ سُخن سا تھا

تارے تھے چاندنی میں، کہ تہمت کے داغ تھے

مُحسن کل آسمان بھی، میرے کفن سا تھا

مُحسن نقوی

Kal Raat Bazm mein Jo mila, Gulbadan sa Tha

Khushboo sy Us K Lafz Thay, Chehra Chaman sa Tha

Deikha Ussay To Bol parray Us K Khad-o-Khaal

Pucha Ussay To Chup sa Raha, Kam-Sukhan sa Tha

Tanhaiyoun Ki Rutt mein Bhi Lagta Tha Mutmainn

Woh Shaks Apni Zaat mein ik Anjuman sa Tha

Socha Ussay, To mein Kayii Rungoon mein Kho gaya

Alam Tamaam Us K Haseen pairhann sa Tha

Jo SHaakh Shookh Thi, Woh Us K Laboon C Thi

Jo Phool Khil gya, Woh Ussi K Dehan sa Tha

Woh Saadgi pehan K Bhi Dil mein Utarr gaya

Uss Ki Her ik Ada mein Ajab Bhoolapan sa Tha

Asmaan Samjh rahay Thay Ussay Shehar-e-Jaan K Log

Mushkil Tha iss Qadar, K Meray Apnay Funn Sa Tha

Woh guftagu Thi Uski, Ussi K Liye Hi Thi

Kehnay Ko, Yooun To mein Bhi Shareek-e-Sukhan sa Tha

Taaray Thay Chaadni mein, K Tohmat K Daagh Tha

"MoHSiN" Kal Asmaan Bhi, Meray Kafann sa Tha'

Mohsin Naqvi